dä Paul hätt än dritte Alauf gnah um mit euis uf Sessa z’fahre!! Aber scho im Vorfäld hätt er euis informiert dass äs au demal nöd klapped…
det isch irgendäs Festival und s Menue hetti 69 Franke kosted! Also äs Ersatzprogramm…!

Mir fahred uf dä San Salvatore mit eme super Angebot für d Fahrt mit äm Bähnli inkl. Zmittag!

Das tönt doch guet!

Am Dunnschtigmorgä bricht dä Paul alli Rekord
15 Persone chömmed mit! Kei Ahnig wänn das z’letscht Mal vorcho isch! Guet gluunet fahred mir äm Tessin zue. Womir dänn bi dä Bahn in Lugano achömmed aber….

Äs söll offebar nöd si dass mir uf dä Berg fahred… i dä Nacht hätt dä Blitz igschage und d’Bahn chan nöd fahre!! Was jetzt?
Churz entschlosse mached mer euis uf dä Wäg zum Monte Bre! In Lugano finded mer än Bus wo euis setti det ane bringe! Mer telefoniered au na is Restaurant und tatsächlich händs au na Platz für euis!
Aber ebe… mir sind im falsche Bus und fahred vill z’wyt, nämmli uf Monte Bre und das isch äs Dörfli underhalb vom Berg!

Was jetzt? Zum laufe isch äs ä halb Stund aber äs paar vo dä Teilnehmer chönnd halt nümme so wyt laufe!
D Gruppe teilt sich drum uf, än Teil lauft, die andere nämmed dä nöchschti Bus wieder zrugg uf Lugano zum Bähnli!

D‘ Laufgruppe isch bald mal dobe und gnüsst än feine Apero bis die andere dänn au iträffed! Bime feine Mittagässe hämmers gmüetlich und luschtig!
Dä Chällner isch zwar dänn bitzli überforderet wo är ghört dass mir alli einzeln zahle wännd!! Aber au das schaffed mer und dänn nämmed mer dä Rückwäg zum Bähnli in Agriff! D Iris isch froh dass mer s’Bähnli chönnd näh und nümme dä Bus… äs isch doch rächt ä kurvigi und engi Strass gsy bim ufefahre!

Z’Lugano chunnt bald scho än Bus zum Bahnhof und mir chönnd in en leere Zug istiege!
Äs isch än spannende, schöne und gmüetliche Tag gsy! Trotz allne Umwäge sind alli guet gluuned und so chömmed mer dänn zfriede und chli müed wieder z’Züri a!

Herzliche Dank Paul für d’Organisation! Wer weiss, villicht schaffed mers doch emal na uf Sessa oder ebed uf dä San Salvatore! Mer müend bime Usflug is Tessin offebar eifach flexibel sy!

Mit äme herzliche Berg-Frei

Brigitte