Eigentli wäred mer ja mit äm Paul uf dä Zugersee gange…

Aber dä Paul und s Heidi händ wahrschinli gwüsst dass äs bi euis sehr heiss wird si und drum sind sie in höche Norde gange... und ich han dä Alass übernoh, aber dänkt mir mached öppis anders!!

Dänkt wär gsy, dass mir vo Chrüzlinge mit äm Schiff uf äm Undersee und Rhy bis uf Schaffhuse fahred. Aber ebe….. wills so heiss und troche isch, chan s Schiff numme bis
Stei am Rhy fahre und vo det muess mer dänn zum Bahnhof laufe … nöd so luschtig i derä Hitz! Drum hätt sich d Organisatorin churzfrischtig umentschide!
So sind 6 munteri Naturfründ vo Züri uf Rorschach -Hafe gfahre . Nacheme Startkaffi und em obligate WC-Halt isch dänn scho bald euises Schiff „St.Gallen“ im Hafe igfahre.

Äs hätt vill Platz und wills hüt ebe doch nöd so heiss isch wie dänkt simmer dänn grad is Restaurant gsässe! Trotz Nussgipfel zum Kaffi am Hafe, händ doch alli äs Hüngerli!
D Menuecharte verspricht vill und d Uswahl fallt schwer! Aber alli findet öppis und scho bald chömmer au astosse uf än gmüetliche Tag! Bi Spies und Trank vergaht d Zyt bis uf Konstanz doch schnäll!

Jetzt wird’s au wieder eher warm und
d Sunne zeigt sich vom fascht wulchelose Himmel. Das heisst für euis: JETZT müemmer no äs Glace ha! Diräkt am Hafe in Konstanz werdet mer fündig! Mmhh…. So fein!
Alli sind zfriede und die gmüetlich Rundi gnüssd dä herrlich Tag und s feine Dessert.

Um die drüü mached mer euis dänn uf zum Bahnhof. S Vreni und dä Walti gönd diräkt RichtigToggi und mir andere Richtig Züri...

Ganz än tolle Tag mit vill Schwätze und Lache gaht z‘ Änd !

D Schiffahrt vo Chrüzlinge uf Schaffhuse mached mer dänn s nöchscht Jahr wänns (hoffentli) wieder meh Wasser hät!

Mit äme herzliche Berg-Frei

Brigitte