Am Sunntigabig hätts usgiebig grägnet (also eigetli Bindfäde gschiffed!!), aber niemmert vo  dä Agmäldete hät abgseit! Also bin au ich zueversichtlich!

Am Mäntigmorgä trifft sich äs Grüppli vo 6 Naturfründä am Bahnhof Züri. In Winterthur stiegt dänn no d Iris zue, so simmer vollständig und parat für d Wanderig!
In Nussbaume gits dänn mal än Startkaffi und äs isch tatsächli troche womer dänn loslaufed!

 Än schöne Wäg füehrt euis Richtig Nussbaumersee und dänn zum Hüttwilersee! Alles Naturwäg, so schön! Allerdings simmer fascht die einzige wo underwägs sind, ussert äs paar «Hündeler» (die müend natürli immer use!) Aber au mir sind immer troche underwägs und mir findet dänn no ä perfäkts Plätzli für än Stundehalt! Nachere churze Pause marschiered mir munter witer Richtig Kartause. Nach rund 3 Stund Marschzyt chömmed mer dänn det a. Dä Peter isch bitzli uf dä Wegge aber nach äme Bier wird au er wieder munter!
Im Restaurant Mühli werdet mir sehr fründli bedient und s Ässe isch sehr fein, halt nöd ganz günstig aber äs lohnt sich! Mir lönd euis Zyt und händ vill zum schnädere! Nach äm Ässe bliebt dänn au na Zyt zum d Kartause no chli azluege, Föteli mache und im Hoflade no chli poschte! Äs hätt vill feini Sache und mir gönned euis dänn au na äs feins Glace!

Am halbi vieri fahred mer mit äm Postauto via Frauefeld wieder heizue! Mir händ än ganz än tolle, gmüetliche und vor allem trochne Tag gha! Z Winterthur leerts zwar grad chli abe, aber mir sind ja im Zug!

Ich möchti mich bi allne herzlich bedanke fürs mitcho und für die gmüetliche Stunde! Schön isch au, dass mir 2 Kollege vo dä Sektion Senioren händ chönne begrüesse uf derä Wanderig! D Ruth und dä Karl-Heinz sind scho öppe mit euis mitcho und ich find das toll dass mer so Sektionsübergriefend chönnd underwägs sy!

Bis zur nöchschte Wanderig oder äre Schifffahrt!

Mit äme herzliche Berg-Frei

Brigitte