Ja, das isch für d’Organisatorin nöd eifach gsy….. dä Wätterbricht hätt ständig gwächslet und er isch je länger je schlächter worde!

Nün Naturfründ händ sich agmäldet gha. Verschiebe uf en andere Tag isch leider nöd möglich gsy, alli händ halt scho anderi Termine gha!
Nach Rücksprach mit dä Teilnehmer hämmer beschlosse doch nach Davos z’fahre! 3 Persone händ dänn derä Sach doch nöd so traut und sich abgmäldet.

Am Mäntigmorgä simmer dänn optimistisch Richtig Davos gfahre!
In Landquart isch dänn au dä Walti us äm Toggi zu euisem Grüppli cho. In Davos acho zerscht mal än churze Schreckmomänt…. Dä Walti verlüürt sini Schuehsohle... aber er meint das gaht scho so, mir sind hüt ja optimistisch underwägs!
Für dä Bus zum Dürrbode hani mi agmäldet gha, wär aber nöd nötig gsy, mir sind ellei mit äm Chauffeur underwägs! Äs isch chalt und füecht da obe! Im Dürrbode gits dänn zerscht mal än Kaffihalt und än feine Nussgipfel! Dusse fangts a rägne und schneie! Also Chappe, Händsche etc. uspacke und montiere! Immer na optimistisch mached mer euis uf dä Wäg.
Äs blast än zügige Wind und dä Walti hät jetzt au äs Problem mit dä zweite Schuehsohle! Aber er lauft tapfer mit! Nach drüüviertel Stund chömmed mer an ere Bushaltestell verby! Was mache? Äs fangt jetzt rächt a rägne! Zerscht mal äs Gruppeföteli als Erinnerig und dänn beschlüsset alli, dass mer das Experimänt da jetzt abbräched und dä Bus nämmed wo i äs paar Minute sötti cho! Dä Chauffeur hät schön glached wo er euis wieder gseh hätt!
Im Restaurant Teufi hämmer euis dänn bi me Apero und spöter mit eme feine Zmittag wieder ufgwärmt.

Nach äm Zmittag isch s Wätter leider nonig besser und dä Wind eher stärcher, drum nämmed mer au für die nöchschti und letschti Etappe dä Bus bis nach Davos. Mit äm Zug gahts dänn wieder am Underland zue. Dä Walti hätt die zweiti Sohle dänn z Landquart ändgültig au na verlore und er isch glaub mit nasse Füess wieder im Toggi acho!

Alli andere sind mit trochne Füess wieder z’Züri glandet und alli sind sich einig gsy:
äs isch trotz allem än gmüetliche Tag gsy!
Mer händ wieder emal chönne schnädere und lache und alli die Optimiste freued sich uf ä Wiederholig (aber bi schönem Wätter!!) im nöchschte Summer!

Än Pessimist würd säge: „ ausser Spesen nichts gewesen“ aber mir säged: 

„S' git kei schlächts Wätter wänn
d' Usrüschtig (und d Schueh?) und
d' Kameradschaft stimmt und wänns än Bus git!"

Mit eme herzliche Berg-Frei und eme Danke fürs Mitcho!

Brigitte