5 Naturfründ sind underwägs uf dä Wanderig im schöne Wandergebiet im Goldinger-Tal! Nach äm Startkaffi im Restaurant Atzmännig-Schutt fahred mir mit äm Sässellift uf Berg! Äs bliebt au vill Zyt zum umeluege..!
Dä Lift isch sehr gmüetlich underwägs!! Dobe acho heissts dänn aber wandere! Zerscht emal gahts grad ächli obsi, aber mit sind fit und munter underwägs! Ufgrund vom Vorwandere entschlüsst sich 
d Organisatorin binere Abzwiegig dä «gmüetlicheri» Wäg z näh und uf dä Übergang via Tweralpspitz z verzichte! Gmüetlich??
Ja sicher gmüetlicher als über dä Tweralpspitz, aber au dä Wäg hätts scho chli in sich… Viel Stäge und immer wieder chli ufe und abe! Und zwüscheddure lieged na äs paar Chüeh zmitzt uf äm Wanderwäg, mir müend uswiche, sie mached kein Astalte zum ufstah!

Pünktlich zum Mittagässe chömmed mir i dä Chrüzegg a. Mir gnüssed äs feins Ässe uf dä Terrasse. Wo sich aber dä Beat mit ere «alte» Sunnecreme ischmiert isch äs plötzli verby mit dä Sunne! Die hätt sich vor luuter Schreck wäge dere Creme grad hinder ä grossi Wulche verschobe! ?

Äs wird dänn au plötzlich ä chli chüehl und drum mached mer euis dänn bald mal uf dä Abewäg!

Ja, es gaht abwärts… und dänn na wie!! Äs haut scho grad chli i d Bei! Und äs wird au wieder wärmer und wärmer wo mer Richtig Tal laufed! Also isch namal ä chli schwitze agseit! Alli sind guet underwägs und ich stuune immer wieder wie fit euise Peter mit sine 83 Jahr isch! Alli Achtig!

Dä Bus isch grad abgfahre wo mir im Atzmännig-Schutt achömmed, aber das isch euis grad rächt... 
So chömmer euis nochli vom Abstieg erhole und gmüetlich öppis trinke! D VZO bringt euis dänn spöter nach Rüti und d S-Bahn heizue!

Äs isch än ganz än tolle Tag gsy! D Wanderleiteri dankt dä Mitläufer für die toll Begleitig!

Mit eme herzliche Berg-Frei

Brigitte