Rothenthurm - Steinstoss - 3. Altmatt

Am 27. Januar hät d Wanderleiteri 5 Teilnehmer chönne begrüesse!
Dä Reto wär au gärn mitcho aber er hät Zahweh und muess zum Zahni! Eigetli wärs ä Winterwanderig, so stahts im Programm! Aber i dä letschte Täg isch dä Schnee weggschmulze, mir sind gspannt was euis erwartet. Nachere relativ churze Afahrt beschlüssed mir in Rothethurm no äs Startkaffi z näh.

Frisch gstärkt mached mer euis dänn uf dä Wäg…
aber wo isch dä Winterwanderwäg? Die pinkige Tafle sind zwar da, aber ebe... dä Winterwäg würdi parallel zu dä Loipe verlaufe und es hätt ebe weder ä Loipe no än Wäg! Alle Schnee wäg, s Langlaufzäntrum gschlosse und das im Januar! Mir müend drum dä Summerwäg näh und nachere Stund chömmed mir dänn au scho zum Restaurant Steinstoss. Das isch ä chlini, gmüetlichi Beiz, so wie mers ebe kännt us dä Innerschwyz! Alli findet öppis feins uf dä Charte und mir werdet fründlich bedient.  

Nach dere Pause gahts wyter, wieder uf äm Summerwäg aber dänn chömmed mer doch no chli is schliffere…
Am Schatte hätts plötzli doch nochli Schnee bzw. äs isch rächt isig. Aber au das schaffed mer und i dä 3.Altmatt hämmer grad Aschluss uf än Bus nach Biberbrugg. Vo det fahred mer gsund und munter mit äm Zug wieder Züri zue!

Äs isch än gmüetliche Tag gsy und mir händ ja, ussert äm fehlende Schnee, Glück gha mit äm Wätter, zwüscheddure hämmer sogar d Sunne äs bitzli gseh!

Danke dass ihr mitcho sind!

Klosters  - Alp Garfiun – Klosters  

Am 20. Februar staht die zweiti Winterwanderig uf äm Programm.
D Wanderleiteri trifft ihri Begleitige, 4 Naturfründ und zwei Gäst, z Landquart am Bahnhof will sie immer no im Winterdomizil in Flims isch! Dämal isch au dä Reto deby, ohni Zahweh( so hoffi)!

D RHB bringt euis nach Klosters und ohni Startkaffi nämmed mer grad dä Bus bis Monbiel. Ob mir hüt Schnee aträffed? Äs hätt i dä letschte 4 Wuche kei Niederschlag gäh, eifach Sunne pur! Schön für

d Wintersportler aber natürli schlächt für dä Schnee! In Monbiel isch dä Wäg zerscht aber troche. Aber bald chömmed mer dänn doch no uf än Schneewäg! Mer händ ja d Iseli und d Stöck nöd vergäbe mitgnah! Und… s Wätter isch ja eifach prächtig, Sunne pur und ä herrlichi Ussicht uf d Bündner Bergä.

Zum Glück hämmer grad dä Bus gnah in Klosters, mer träffed am halbi zwölfi uf dä Alp Garfiun i und händ grad na Glück mit eme Tisch a dä Sunne. Reserviere cha mer ebe da nöd vorher! Und chum sitzed mer chömmed
d Rösslikutsche mit vill Lüüt a und d Terrasse füllt sich dänn rassig!

Mir gnüssed öppis feins a dä Sunne ! Dä Rückwäg isch dänn zum gröschte Teil uf Schneewäg bis churz vor Klosters. Au det hätt sich vill veränderet i dä letschte Jahre. Äs isch grad bitzli schwierig äs Kafffi z finde! Aber mir werdet fündig! Im Kaffiklatsch, ä speziells aber cools Kaffi, gits dänn no äs Zvieri bevor mer euis uf dä Heiwäg mached. Z Landquart tränned sich euisi Wäg… die eine nutzed d Zyt na zum is Outlet z gah, die andere nämmed dä (meh als vollni Zug!!) nach Züri und
d Wanderleiteri fahrt wieder Richtig Flims! Äs isch än super schöne, gmüetliche und sunnige Tag gsy!

Danke für eui Begleitig!

Bis zu dä nöchschte Wanderig im Früehlig

Mit emä herzliche Berg-Frei

Brigitte