Home


Wir über uns


Das Team


Anlässe / Daten


Berichte



E
rinnerungen



Links


 

Toggenburg-Wanderung  27.9.2018

Dä Tag hätt's in sich!.... 

   Am Morgä am 7.20 stahn ich ällei am Bahnhof! Also ich han gwüsst, dass ich eigentlich nur uf ei Person warte muess (ich will kein Näme nänne), will die andere irgendwo zuestieged! Aber dänn bin i halt ällei zum Zug gange! Dä Paul isch dänn, wie abgmacht, uf äm Perron erschiene und 
z' Winterthur isch dänn d' Iris zuegstiege, aber sie hämmer erscht z' Wil dänn troffe (au das isch abgmacht gsy)! 
Nur dä Hansruedi hämmer vermisst, ich dänke er hätt s Datum eifach vergässe! So simmer z' dritte Richtig Bütschwil gfahre, det settet mer s' Vreni und dä Walti träffe! Aber ohalätz, churz vor äm Usstiege schriebt's Vreni dass sie ä halb Stund Verspötig heiget... Das chann ja passiere, dass mer dä Aschluss verpasst…. Aber nei, sie händ vergässe z Wattwil umstiege!!!! 
Und das bi Iheimische….. 

Ja nu, nöd so schlimm. Mir drüü händ ä halb Stund in Bütschwil dä Bahnhof und sini Umgäbig gstudiert! Die händ sogar no ä rächti Poscht!!!

Dänn hämmer au eusi Toggenburger troffe und dä Bus nach Lütisburg Dorf gnah! Det gahts dänn ächli obsi bis uf Tuffertschwil! 
Im Rössli isch dä Kaffi fällig! D Serviertochter heisst euis herzlich willkomme! Ä herzigs Meitli, aber noch chli müed? S' Rivella vo dä Iris isch än Schluck chliner (däfür gratis) und dä Walti chunnt statt ä heissi Schoggi än Kaffi zum Nussgipfel über! Wahrschienli hätt sie dänkt dass dä Nussgipfel scho süess gnueg seig!!! 
Aber wie gseit, das hät euis gar nöd gstört! Mer händ dänn na d Menuecharte fürs Mittagässe gstudiert, aber viellicht chömmed mer ja eh öppis anders über?!!!

Dänn hämmer dä Windredli-und Comicwäg under d' Füess gnah! Ganz gmüetlich simmer Richtig Winzenberg gwanderet! Immer wieder stille stah und all die Statione studiere! Bi dä Windredli isch immer än Bruef beschriebe! Und au 
d' Comicfigure kännet mer fascht alli! Im Winzenberg gits än Apero bevor mer euis uf dä Wäg nach Tuffertschwil zrugg und zum Zmittag mached!

Än sunnige Tisch isch da für euis reserviert! Und mer krieged au das, wo mer bstellt händ!! Mer händ im Fall immer no die glich herzig und fründlich Serviertochter!

Mer gnüssed än feine Zmittag und än Dessert und dänn gahts nomal öppe 20 Minute zrugg nach Lütisburg Dorf! 
Dä Bus nach Tuffertschwil fahrt euis an Bahnhof und det gönd die eine zrugg nach Krummenau und die andere Richtig Wil-Winterthur-Züri!

Also d' Toggeburger sind guet und ohni Umwäg heicho! Und vo dä andere hoff i das doch au!


Äs isch än tolle, sunnige und luschtige Tag gsy!

Danke Vreni für d Organisation vo däm gmüetliche Alass! Ich hoffe äs chömmed bald wieder emal meh Lüüt mit! Ihr wüssed gar nöd was ihr amigs verpasset!!!!

 

Mit äme herzliche Berg-Frei

Brigitte

 



   
   
   
   
   

>> SEITENANFANG <<


Externe Seiten: Verantwortlichkeit
Wir lehnen jede Verantwortung über Inhalte verlinkter externer Seiten ab! Für den Inhalt dieser Seiten sind die jeweiligen Betreiber/Verfasser selber verantwortlich und haftbar.
 

Copyright
Die Inhalte auf dieser Website unterliegen dem generellen Urheberschutz
und sind Eigentum der jeweiligen Autoren und Fotografen!
Entsprechende Fragen sind an den Webmaster zu richten.



 

Last Update and © by nfvbz webmaster  07.01.2019 15:41