Home


Wir über uns


Das Team


Anlässe / Daten


Berichte


Links


 

Toggenburg - Wanderung  vom  9. Juni 2017

 

 

 Ame schöne Morgä fahred mir uf Alt St.Johann. S Vreni hätt ä gmüetlichi Beiz usgsuecht für Kaffi und Gipfeli. Es isch allerdings nochli frisch und dä Wind blased euis um d Ohre!

 Aber zum laufe isch äs ideal! En gmüetliche Wäg füehrt euis dä Thur na. Bis öppe uf Starkebach isch äs würkli flach und mer ghört die munter Gruppe schnädere! Aber dänn…… läck gaht das steil ufe! Und dänn die Stägetritt! Nöd gmacht für Lüüt mit churze Bei! Keis Wort ghörsch meh, all sind beschäftiget mit Schnuufe! 

Aber dänn hämmer dä Hoger gschafft und äs git än wohlverdiente Halt ! Und au s schwätze und lache gaht wieder los! All händ wieder gnueg Schnuuf! Witer füehrt dä Wäg bis Stein, det beschlüsst s Vreni dä Bus z näh, und dä Franz isch froh und als guet Kolleg begleitet er s Vreni! Mir andere wanderet witer, zum Teil höch über dä Thur und mir wüssed dass d Beiz uf dä andere Siite isch… Das heisst mir müend irgendwänn abe an Fluss und äne wieder ufe..! Aber au die Hürde schaffed mer ohni Murre! Mir wüssed ja, nachher gits z ässe und z trinke! 

Gäge die halbi eis chömmed mir im Germe a. Dä Franz und s Vreni sind bim Apero und mir au bald! Dä Andi chunnt na mit dä Sarina und äs feins Ässe laht alli Strapaze wieder vergässe! S Kaffi und Dessert nämmed mer dänn doch no dusse und mit vollne Büüch mag eigentli niemmert meh wyt laufe! Drum nämmed mer am drüü dä Bus und fahred via Wattwil wieder heizue!

Äs isch än tolle und gmüetliche Tag gsy, s Wätter hät mitgspillt und d Organisation vom Vreni hät tiptop klappet! Herzliche Dank! Im Septämber chömmed mer wieder is Toggeburg!

 

Mit eme herzliche Berg Frei

Brigitte

  

 


Externe Seiten: Verantwortlichkeit
Wir lehnen jede Verantwortung über Inhalte verlinkter externer Seiten ab! Für den Inhalt dieser Seiten sind die jeweiligen Betreiber/Verfasser selber verantwortlich und haftbar.
 

Copyright
Die Inhalte auf dieser Website unterliegen dem generellen Urheberschutz
und sind Eigentum der jeweiligen Autoren und Fotografen!
Entsprechende Fragen sind an den Webmaster zu richten.



 

Last Update and © by nfvbz webmaster  09.12.2017 16:43