Home


Wir über uns


Das Team


Anlässe / Daten


Berichte


Links


 

Tirggel - Bäckerei  30. 9. 2016

 

 

A däm sunnige Tag trifft sich ä rächt grossi Gruppe vo
20 Lüüt zum go Tirggel bache z Wald im Züri Oberland.

Mir sind rächt früeh dra und für die wo dä Zug verwütscht händ, gits drum na än Kaffi vor äm bache! Dä Walti hätt Glück gha dass är mich z Uster im Zug troffe hätt….
Susch würd är villicht hüt na z’Wetzike stah…!!!!

Gäge die zwei träffed dänn au na die Verspötete i! Jetzt chas losgah!
Mir werdet i dä Bäckerei Honegger fründlich begrüesst.
D Gruppe wird teilt und die eine gönd scho i d Bachstube, die andere chömmed zerscht emal vo dä Frau Honegger ä Ifüehrig über. I dä Bachstube verzellt euis dä Herr Honegger öppis über dä Teig und s Gheimnis vom Tirggel bache. So zum Bispiel, dass euise iheimisch Honig nöd geignet isch für Tirggel. Tatsächlich bruucht er Honig us Yucatan in Mexico! Chönnti  ihm ja ächli mitbringe wänn ich s nöchscht Jahr det hi gange….!!!!!

Tirggel bache isch ä Geduldssach! Dä Teig muess ruebe und dänn werdet alli Model vo Hand mit äm Teig usgleit und adruckt. Än riesige Ufwand und er macht alles vo Hand! Au mir händ müesse a d Seck, aber so eifach isch das nöd, gäll Paul, mer muess ganz sorgfältig dä Teig ufs Model legge und dänn mit Gfühl, aber doch nöd z’lang uf das Model trucke, wämmer nämmli z’lang druf ume truckt dänn wird dä Teig z’warm und s ganz Bild isch ächli verzerrt! Sovill Ufwand und das ganzi bruucht nochher grad emal  ä Minute und drissig Sekunde zum Bache bi guet 400 Grad!!! Mir händ alli dänn die sälber gmachte Tirggel dörfe heinäh und au na äs Täschli mit Underlage etc.

Ich bi i dä erschte Gruppe gsy, han zerscht bache und dänn no Infos vo dä Frau Honegger übercho. Äs wär super gsy wänns nöd zwei  Fraue gha hätt, wo immer händ müesse dri rede (schnurre!!) Aber ebe, mer nämmed alli wie sie sind!!!! Tirggel sind für mich mit ganz vill Chindheitserinnerige verbunde, ich bin sozäge mit Tirggel gross worde…  Drum isch die Füehrig für mich öppis ganz speziells gsy!   Danke Vreni fürs Organisiere!!!!

Nach dä Füehrig gits dänn na än Kaffi  bim Voland und nach dä Föife gömmer uf dä Bus und via Rüti wieder heizue...!

Sind ächt scho alli Tirggel gässe?  Am  Zischtig nach dä Füehrig hani i dä Zitig gläse dass dä Honegger im Früehlig ufhört und s Rezäpt ame Bäcker vo dä St.Jakob-Bäckerei in Züri übergit!!!!
Tirggel chömmed nämmli ursprünglich us dä Stadt Züri!! Drum au die ville Motiv vo Züri!! Schad , aber wenigschtens bliibt d Tradition erhalte und mer chönnd witerhin Tirggel chaufe und müend nöd emal uf Wald ufe fahre!!!

Mit äme herzliche Berg-Frei

Brigitte

 

 
   
   
   
   
   
   

 


Externe Seiten: Verantwortlichkeit
Wir lehnen jede Verantwortung über Inhalte verlinkter externer Seiten ab! Für den Inhalt dieser Seiten sind die jeweiligen Betreiber/Verfasser selber verantwortlich und haftbar.
 

Copyright
Die Inhalte auf dieser Website unterliegen dem generellen Urheberschutz
und sind Eigentum der jeweiligen Autoren und Fotografen!
Entsprechende Fragen sind an den Webmaster zu richten.



 

Last Update and © by nfvbz webmaster  20.09.2017 15:39