Home


Wir über uns


Das Team


Anlässe / Daten


Berichte


Links


 

Panoramaweg - Wanderung  16. 8. 2016

 

         

Am Fritig am Morgä sind 11 wanderluschtigi  Naturfründ underwägs vo Züri via Einsiedle zur Laucherenalp-Bahn! Dä Wätterbricht verspricht än sunnige Tag und so gsehts au us, obwohls am Morgä da und det nochli grägnet hät.
Bi dä Bahn acho gsehn ich ä Tafle „ Wegen schlechter Witterung Betrieb eingestellt“!!

Das chan ja nöd sy, d Gisela hät doch dobe i dä Beiz Kaffi und Gipfeli bschtellt und d Sunne druckt! Äs Telifon i d Beiz, ja d Wirtin isch parat und wartet uf euis, nei sie weiss nüt devo dass
d Bahn nöd fahrt….!! Aber uf dä Infotafle staht dass d Beiz zue isch…
Was händ ächt die i dä Innerschwyz für ä Kommunikation? Was jetzt? Dä Postautochauffeur git euis dänn dä Tipp mir sölled mit ihm zruggfahre und underwägs dänn umstiege uf dä Bus zur Ibergeregg. Mached mer doch kurzentschlosse!

I dä Ibergeregg  acho gits dänn doch äntli dä verdienti Kaffi! Und jetzt? Mir sind det wos numme no öppe 10 Minute zu dä Beiz gaht wo eigentlich dä Mittagshalt planet isch! Das chömmer ja schlächt mache, jetzt scho go Zmittag ässe! Ächli laufe muess schon na sy!

Also gömmer äs Stuck uf däm Wäg, wo mer eigentli hercho wäret! Ä schöns Panorama belohnt euis und so nach drü viertel Stund chehret die erschte dänn um. Mir gönd wieder zrugg zur Ibergeregg und dänn i d Sunnehof-Hütte. Ganz ä fründlichi Bedienig und äs sunnigs Plätzli ladet zume gsprützte Wysse i! Bald scho chunnt dänn au dä Reschte vo dä Gruppe und ganz gmüetlich ässed mir Zmittag! Die 4945 Schritt zum grosse Mythe hämmer euis dänn gspart…..!!!

Dä Wäg zur Holzegg isch guet z mache, au mit äme vollne Mage! I dä Holzegg acho beschlüsset mer diräkt is Brunni abezfahre, mit äm Bähnli, damit mers Postauto sicher verwütschet. Dä Ma am Bähnli isch erstunt dass mir keis Rundfahrtebillett händ, nöd emal er hät gwüsst dass d Laucherebahn nöd gfahre isch!!!

Im Alpthal hämmer no Zyt zum ächli am Bach höckle und dä Franz chunnt eimal meh in Gnuss vome abchüehlende Bad!

Via Einsiedle gahts dänn wieder heizue! Äs isch än gmüetliche Tag gsy und äs Email a d Laucherebahn isch dänn au no erfolgt! D Anwort isch gsy, dass es ebe am morgä am siebni no grägnet heig und drum d Bahn nöd gfahre seig und  dass i some Fall au d Wirte informiert werdit! Jetzt weiss i natürli nöd ob d Wirtin i dä Lauchere gmeint hät mir laufet ufe!! Aber nöd wänns eigentlich äs Bähnli hetti!!!

 

Än herzliche Dank a d'Gisela und an Richard für d'Organisation !
 

Mit eme herzliche Berg-Frei

Brigitte

 

       
         
       
         
       
         
       
         
       

Externe Seiten: Verantwortlichkeit
Wir lehnen jede Verantwortung über Inhalte verlinkter externer Seiten ab! Für den Inhalt dieser Seiten sind die jeweiligen Betreiber/Verfasser selber verantwortlich und haftbar.
 

Copyright
Die Inhalte auf dieser Website unterliegen dem generellen Urheberschutz
und sind Eigentum der jeweiligen Autoren und Fotografen!
Entsprechende Fragen sind an den Webmaster zu richten.



 

Last Update and © by nfvbz webmaster  20.09.2017 15:39