Home


Wir über uns


Das Team


Anlässe / Daten


Berichte


Links


 

Nagens  5. - 7. 1. 2015

 

Was wär äs Naturfündjahr ohni Nagens?

Also das würdi ja gar nöd gah! Drum träffed sich das Jahr 15 Pischtefäns am Mäntig am Morgä a dä Talstation z Flims! S Wätter chönnt nöd besser sy, aber hätts ächt au gnueg Schnee? Bim Träffpunkt gahts zerscht emal wie immer ä chli hektisch zue und her. Gäld izieh, Billett hole, mit Sack und Pack ufs Bähnli, aber mit sinds eus ja gwöhnt und scho bald gondlet mir Richtig Nagens.
Dobe acho no än Kaffihalt und dänn ab uf d Pischte. Äs sind nöd alli Abfahrte offe, aber die präparierte Pischte sind super und absolut guet befahrbar.




Die eine chönnds nöd erwarte und hauets ab ohni Kaffihalt. Aber jede weiss ja wo dure und äs isch niemmer  ellei underwägs. Äs gaht ächli än chalte Wind und mer müend euis guet ipacke!  Gäge dä Abig träffed dänn alli wieder gsund i dä Nagens i.



Dusche oder au nöd und dänn gits scho die erschti Spielrundi, en Apero oder ächli gmüetli zämmesitze bis zum Znacht. Dä isch das Jahr wieder super guet und nach em Schlemme gits ä witeri Jass-und Spielrundi. Ä herzigi und ufgstellti Barmaid sorget für euises liblichi Wohl!! Weiss öpper  vo denä wo nöd debi gsi sind  das mer ä Wöschmaschine au cha trinke!!!!???
Langsam sind alli ä chli müed vom lange Tag und äs git bald emal die wohlverdienti Nachtrueh!

Än wunderschöne Morgä mit emä super schöne Sunneufgang erwartet euis am Zischtigmorgä! D Natur isch doch phänomenal! En usgibige Zmorgä mit dä obligate Schöggeli vom Vreni (danke villmal) und dänn heissts scho wieder ab uf d Schi! Mir müend dä herrlichi Sunneschy usnütze. Punkt nüni trifft au na dä Richard i, jetzt simmer vollzählig! Uf dä Pischte gits einzelni Grüppli und so chömmed mer halt erscht gäge dä Abig wieder zämme!




Nacheme feine Znacht gits ä wyteri  Spiel- und Jassrundi. Und au hüt gits ä Wöschmaschine… Was i nonig usegfunde han isch, ob s blaui Gsöff dä Weichspüeler und dä Zitronesaft dä Entkalcher isch…. Aber au das findet mer no use…!!  S Schissipapier  (suubers!!) i mim Bett hani artgerächt entsorgt, wänn im Bett vom falsche Kolleg!!!!! Aber wie heissts eso schön? Mitgegangen mitgefangen….. Das au mini Händsche ime fremde Bett gläge sind hani erscht am nächschte Morgä gmerkt wonis vermisst han...  Aber ebe , das sind d Erläbnis vome Masseschlag und alli wo nöd debi gsy sind wüssed nöd was sie da amigs verpassed!!!!

Am Mittwuch isch nomal en superschöne Tag, ab uf d Pischte und die herrlichi Sunne gnüsse! Allerdings händ die eine scho bald packt zum heifahre. Pflichte rüefed!! Am Namittag chunnt no d Esther mit dä Zwilling ufe und mir fahred mit ihne no ä paar Abfahrte. Gäge die föifi gönd dänn au die letschte Richtig Flims und heizue.

Äs sind drüü ganz geniali Täg und mir händ scho buechet für 2016!!!!! Chumm doch au emal mit, da chasch würkli öppis erläbe!! Danke villmal Vreni für d Organisation und für
d Schöggeli!!

 

Mir fröied euis alli uf s nöchschti Jahr!

Mit eme herzliche Berg-Frei  Brigitte

 


Externe Seiten: Verantwortlichkeit
Wir lehnen jede Verantwortung über Inhalte verlinkter externer Seiten ab! Für den Inhalt dieser Seiten sind die jeweiligen Betreiber/Verfasser selber verantwortlich und haftbar.
 

Copyright
Die Inhalte auf dieser Website unterliegen dem generellen Urheberschutz
und sind Eigentum der jeweiligen Autoren und Fotografen!
Entsprechende Fragen sind an den Webmaster zu richten.



 

Last Update and © by nfvbz webmaster  20.09.2017 15:39