Home


Wir über uns


Das Team


Anlässe / Daten


Berichte



E
rinnerungen



Links


 

Lenzerheide-Wanderung vom  24. 1. 2020

Am Morgä am 7.50 träffed sich 6 munteri Naturfründ im HB z'Züri!
Än wunderschöne Tag mit vill Sunneschy erwartet euis hüt! Mir fahret bis Chur (in Sargans stieget no euisi Toggeburger zue) und dänn mit äm Postauto bis Lenzerheid Post. Dänn hämmer än Kaffi verdienet!
Mer sind guet bewacht,euis chan nüt passiere, die ganz Polizei vo Lenzerheid isch au bim Kaffi!! Nach dere Pause gahts dänn los zum Heidsee. Äs hätt tatsächli Schnee da obe, au wänn dä Wäg ab und zue ächli isig isch! Ganz än gmüetliche Wäg gaht um dä See, X mal müemmer d'Langlaufloipe überquere, aber das schaffet mir locker! Mer werdet nöd überfahre! Nach öppe 1.30 simmer wieder Richtig Lenzerheid underwägs und z'mitts im Eichhörnliwald gsehnd mer nöd numme Eichhörnli, mer ghöred au Alphornkläng! Dä Bläser hätt zwar grad welle sis Alphorn ipacke, aber für euis hätt  er nomal eis gspillt! Mer losed nochli zue und dänn gahts ab Richtig Pizzeria "da Elio"! Langsam händ doch alli wieder Hunger! Mer werdet sehr fründlich bedient, und au s’Ässe laht nüd z’wünsche übrig!

Äs chunnt dänn no öpper mit euis cho ässe, ich han im Vorfäld mit Burgermeisters Kontakt ufgnah! Dä Theo isch ja eis vo euisne langjährige Mitglieder und är wohnt sit äm letschte Früehlig mit dä Renata in Valbella. Leider isch dä Theo im Momänt nöd guet zwäg, aber d Renata isch mit euis cho ässe! Äs isch doch schön, wämmer so au Mitglieder chan gseh wo ächli wyter wäg wohnet!

Nach däm feine Ässe und bi herrlichem Sunneschy, wämmer eigentlich no nöd hei! Mer händ Glück, uf dä Terrasse vom Kaffi "Aurora" hätts Platz für euis! So gits dänn no än Kaffi mit oder ohni und äs feins Dessert! Mer gnüssed die herrlichi Sunne und nach dä drüü gömmer dänn Richtig Postauto! Dä glichi Chauffeur bringt euis sicher uf Chur und d'SBB (zimmli voll,aber mir händ Platz zum sitze)  Richtig Züri!
In Ziegelbrugg verlöhnd euis dänn d'Toggeburger und s'Rösli wo via Rappi nach Männedorf fahrt!

Müed, aber z'friede chömmed die andere dänn z’Züri a!

Danke allne wo mitcho sind! Äs lohnt sich immer wieder öppis z'organisiere wänn mer so zfriedni Kollegä hät wo mitchömmed! Dä witischt Wäg hät sicher euise Hansruedi us Burgdorf gah! Ich hoffe au är isch na guet heicho! So toll, dass är, mit doch fascht 90gi immer na deby isch!

Mit äme herzliche Berg-Frei

und bis zum nöchschte Mal

Brigitte

 
 







  

>> SEITENANFANG <<


Externe Seiten: Verantwortlichkeit
Wir lehnen jede Verantwortung über Inhalte verlinkter externer Seiten ab! Für den Inhalt dieser Seiten sind die jeweiligen Betreiber/Verfasser selber verantwortlich und haftbar.
 

Copyright
Die Inhalte auf dieser Website unterliegen dem generellen Urheberschutz
und sind Eigentum der jeweiligen Autoren und Fotografen!
Entsprechende Fragen sind an den Webmaster zu richten.



 

Last Update and © by nfvbz webmaster  27.03.2020 15:47