Home


Wir über uns


Das Team


Anlässe / Daten


Berichte


Links


 

Bodensee  12. 10. 2016

 

 

Ä herrlichi Herbschtwanderig erwartet euis a däm schöne, zum Teil no näblige Morgä! Numme grad 7 Teilnehmer sind debi,  alli andere wüssed nöd was sie verpasset!!!!

Z Ermatinge gits zerscht ämal än Kaffi– und WC-Halt! Guet gluunet spazieret mir dur d’Eifamiliehüsliquartier vo Ermatinge, nöd schlächt, alli mit Böötli und so…!!!
Ganz gmüetlich bummlet mir am See entlang, ä super Ussicht uf Dütschland und eifach ei Rueh! Numme Rueh, kei Auto, ab und zue äs Velo oder än Jogger!
Gäge die Zwölfi träffed mer im wunderschöne Dorf Gottliebe i und bi dä legendäre Gottlieber-Hüppe-Fabrik gits sit churzem äs Kaffi! Dä Franz Amgwerd fröged vorsichtshalber mal a, ob mir kei Durscht hebet!!!! Natürli, drum gömmer i das neue Kaffi! Kaffi? Am Mittag? Nei natürli nöd mit euis! Mer bstelled äs Cüpli oder äs Bier und äs Chäschüechli! Ja klar, ä Gottlieber-Hüppe ghört au dezue!

Nach dä Zwüschetverpflägig laufet mer witer am See entlang, bis churz vor Chrüzlinge, dä Franz Amgwerd meint, nä nei, also umesuscht hani min Cervelat nöd mitgnah…. Är sitzt ab und packt sin Rucksack us…. Mir andere mached au e chlini Pause, mir lönd dä Franz ja nöd ellei zrugg, das isch  d’Devise vo dä Naturfründ, keine bliibt ellei zrugg. 

Dänn chömmed mer no bim gröschte Durchgangszäntrum vo dä Schwiz, z’Chrüzlinge verbi, sträng bewacht! Zmitts imä Wohnquartier….!

Bald scho erreichet mer dä Bahnhof und dä Franz verabschiedet sich, will er no äs Date am Rännwäg heig!!! Mir andere nämmed dä Zug uf Konstanz! Wämmer scho da sind!!!! Det zerscht emal ä Pizza, mir händ ja kein Cervelat gha! Und dänn nochli go Shoppe, wämmer scho da sind!!!

Am Föifi sind alli wieder am Bahnhof und mer fahred Richtig Züri, ussert dä Walti, dä fahrt wieder Richtig Toggeburg, vollpackt mit dä Sache wo s’Vreni  kauft hätt!!

Dä Zug isch pumpevoll, aber mir händ Glück und chönnd alli zämmesitze!

Müed, aber zfriede chömmed mir nach dä sächse wieder z’Züri a und gönd i all Himmelsrichtige heizue...!
 

Danke Vreni für d’Organisation vo däm gmüetliche Tag  und bis im nöchschte Jahr!!!!!

 

Mit äme herzliche Berg-Frei

Brigitte

 

 
   
   
   
   
   
   
   
         

Externe Seiten: Verantwortlichkeit
Wir lehnen jede Verantwortung über Inhalte verlinkter externer Seiten ab! Für den Inhalt dieser Seiten sind die jeweiligen Betreiber/Verfasser selber verantwortlich und haftbar.
 

Copyright
Die Inhalte auf dieser Website unterliegen dem generellen Urheberschutz
und sind Eigentum der jeweiligen Autoren und Fotografen!
Entsprechende Fragen sind an den Webmaster zu richten.



 

Last Update and © by nfvbz webmaster  09.12.2017 16:43