Home


Wir über uns


Das Team


Anlässe / Daten


Berichte



E
rinnerungen



Links


 

Bähnlitag vom  27. 9. 2019

         
 

Am Morgä am 8:20 träffed sich 10 munteri Naturfründ am Bahnhof, mir freuied euis uf än gmüetliche Tag! 
S Wätter stimmt und dänn fahred mer mit äm Zug bis uf Frick. Eimal meh ä Gägend wo mer nöd eso guet kännet! Äs Kaffi suechsch in Frick vergäbe.. mer müend mit äme Kaffi vom Kiosk vorlieb näh, aber hauptsach Kaffi!!

Witers gahts mit äm Bus übers Bänkejoch nach Aarau und dänn mit dä Wynetal-Suhretal-Bahn nach Menziken. S hetti det no än schöne Lade am Bahnhof.. aber zum Glück fahrt dä Bus bald ab… susch hettet mer sicher no öppis chauft und mitgschleppt!

Dä Bus bringt euis nach Beromünster, vo witem gseht mer dä alti Landessänder ! Das waren noch Zeiten!! Im Restaurant Bahnhof (ja det isch emal än Zug gfahre!) gits dänn äs feins Zmittag, äs Glas Wy und zum Abschluss für die einte no än Grappa! Dä Kaffi chömmer uf dä sunnige Terrasse trinke! Mer gnüssed die herrliche Sunnestrahle! Ä paar gönd no go d Chile aluege oder susch ächli go spaziere! Am viertel vor drüü nämmed mer dä Bus und fahred über die schöni Hochebeni bis uf Luzern.

Dä Walti und dä Franz nämmed det dä Voralpeexpress und mir andere dä Regio nach Züri.

Äs isch än tolle und sehr gmüetliche Tag gsy! Ich finde so Bähnlifahrte super, äs chönnd alli mitcho und vor allem gseht mer immer wieder unbekannti Gegende i euisere schöne Schwiz! Äs git sicher no meh, ich hoffe dass sich d Alice und dä Heinz für nöchscht Jahr wieder öppis tolls für dä Verein organisieret!

Ich möchte mi im Name vo allne herzlich bi dene zwei bedanke fürs Organisiere!

Äs wär schön, wänn s nöchscht Mal au du wieder emal debi bisch! Äs sind immer gmüetlichi Reise und äs git ganz vill Zyt zum schnädere!!

 

Mit eme herzliche Berg-Frei

Brigitte

 

 

 

 

 

 

 

 

 

 

 

 
 
 
         
         
         
         
         
         

>> SEITENANFANG <<


Externe Seiten: Verantwortlichkeit
Wir lehnen jede Verantwortung über Inhalte verlinkter externer Seiten ab! Für den Inhalt dieser Seiten sind die jeweiligen Betreiber/Verfasser selber verantwortlich und haftbar.
 

Copyright
Die Inhalte auf dieser Website unterliegen dem generellen Urheberschutz
und sind Eigentum der jeweiligen Autoren und Fotografen!
Entsprechende Fragen sind an den Webmaster zu richten.



 

Last Update and © by nfvbz webmaster  11.10.2019 11:20